Ութ հարց գրող Սաթենիկ Ռշտունուն(Բնաբան)

1. Ո՞վ է Սաթենիկ Ռշտունին կյանքում:

- Սաթենիկ Ռշտունին,ինչքանով որ ես եմ նրան ճանաչում,փոփոխություններ սիրող,անընդհատ նորին ձգտող,շուտ հոգնող,շուտ ձանձրացող և շուտ հիացող մարդ է,բոլորի նման սովորական ու եզակի:Ամենաշատը սիրում է կանաչ գույնը ու հենց այդ գույնի բոլոր երանգներով էլ նայում է աշխարհին:

2. Ո՞րն է Ձեր ներշնչանքի աղբյուրը:

- Ամեն ինչ,բացարձակապես ամեն ինչ,ինչ գոյություն ունի կամ չունի,ինչ կարող ենք տեսնել կամ ոչ,ամենավեհից ամենանսեմ,ամենգեղեցիկից ամենաանճոռնի,մի խոսքով ամենաոգեշնչվող եմ:

3. Որո՞նք են այն հատկանիշները, որ պարտադիր են գրողի համար:

- Ես ինքս ինձ դեռ գրող չեմ համարում,բայց իմ կարծիքով չկան որոշակի հատկանիշներ,որոնք միառնշանակ բնորոշ են գրողին:Մարդը մարդ լինի,մնացածը տարբեր բնորոշումներ են,որոնք յուրաքանչյուրի մոտ տարբեր են,յուրովի ու հետաքրքիր:Չգիտես ինչու գրողներն ինձ համար միշտ ծխախոտի,սուրճի ու ալկոհոլի բույրերով, կիսացնդած,ամենասեր ու բազմասեր երևույթներ են,բայց,բարեբախտաբար,ինքս միասեր եմ:

4. Ե՞րբ սկսեցիք գրել:

- Երբ սովորեցի մտածել,սկսեցի հորինել,իսկ երբ սովորեցի գրիչ բռնել ու տառերը նկարել,սկսեցի գրել:Ամենավաղ տարիքի գործեր ունեմ 8-9 տարեկանից պահպանած,չնայած երջանիկ կլինեի,եթե ամենաառաջին գործս պահպանած լինեի.ես սիրում եմ իմ հին գործերը,դրանց պարզությունը,մաքսիմալիզմը,անկեղծությունը:Դրանք իսկապես ես եմ`Սաթենիկը:

5. Ի՞նչ է պակասում ժամանակակից հայ գրողին:

- Ոչինչ,դեռ ավելին,ժամանակակից գրողների մոտ ու համար մի բան էլ ավել է:Կարծում եմ մեր օրերում նույնպես տաղանդավոր ու մեծ գրողներ կան,ու 21-րդ դարը գուցե հետագայում -Ադամանդե դար- համարվի,և շատերս հպարտանանք,որ հենց այս ժամանակներում ենք ապրել:Ժամանակակից գրողը ունի ամեն ինչ դրան հասնելու համար`տաղանդ,պայմաններ,ինքնուրունություն ու ազատություն,ամեն ինչ:

6. Ի՞նչ ազդեցություն ունի հայկական մշակույթը Սաթենիկ Ռշտունին վրա:

- Մենք`հայերս, սիրում ենք մեզ,հետևաբար սիրում և գնահատում ենք այն ,ինչ ստեղծել են մեր նախնիները ու այն,ինչ շարունակում ենք ստեղծել ինքներս:Իսկապես նկատել եմ,որ մշակույթը անմիջական ազդեցություն ունի տարբեր շերտերի վրա`քյառթույից մինչև գիտնական:Այն մենք գենետիկորեն ենք կրում,ու եթե անգամ շատ ժամանակ չենք էլ մտածում դրա մասին,միևնույնն է,ամենքս մեզ հասանելի ու հասկանալի չափով ապրում ենք նրանով:

7. Գրողը ազգություն ունի՞ և ի՞նչ է Ձեզ համար ազգը:

- Հայ  գրողը ուղղակի չի կարող ազգություն չունենալ,քանզի հայ լինելը արդեն իսկ բնավորություն ու տեսակ է ոչ միայն ազգի,այլ նաև հենց մարդու:Եզակի են այն ազգերը,որոնց արժանի զավակներին թվելիս անմիջապես նրանց հայրենիքն ես պատկերացնում,մենք հենց այդ ազգերից ենք:

8. Ձեր կյանքում ամենաթանկ բանը:

- Այս հարցում գուցե կրկնվեմ,բայց ինձ համար ամենաթանկը կյանքն է,բոլոր իմ սիրելի մարդկանց ու իմ կյանքը.ապրել սիրող մարդիկ և´երջանիկ են լինում,և´սիրում են,և´բարի են լինում: